Yaad Hai wo School

Wo school ki ghanti bhejte hi jab neend khulti thi......

aur prayer khatam hone pe hi apni entry hoti thi.

Late hone par jab class k liye daudte hue principal pakad lete the, 

aur har roz naye bahane banane me hum mahir hote the.

Yaad hai, lunch break mein kisi ek k tiffin mein khana kuch zyada hi mazedar hota tha.

Break ke baad wala lectures to neend mein hi nikal jate the, 

hosh to tab aata tha jab teacher chauk maar ke jagate the, 

aur hum ustad headache ka bahana bana ke fir so jate the. 

Jab teacher line se viva lena start karte the, 

aur hum apne number pe aane wale question ka answer ratna start karte the.

Yaad hai jab last lecture mein jab teacher nahi hote the,

aur hum chhutti se 15 min. pehle saari masti band karke bhagne ke liye ready hote the.

School se ghar aane tak match ki puri planning ho jati thi,

aur ghar aake dress change karna sabse bada time waste hota tha.

Jab zindagi mein home-work se badi koi tension nahi hoti thi. 

Dil mein bas school se chhutti marne ki khwahish hoti thi.

Yaad hai jab ek lambi chhutti ke baad school mein bilkul mann nahi lagta tha.

Aaj usi school life mein fir se jane ka mann karta hai.

Yaad hai hume wo school, wo home-work, wo khaali lecture me ki mastiyan.... 

Wo sab kuch yaad hai hume...........

-AryaMridul

WO..... Humara Ghar !!

Ghar humara ek wo ghar h jahan Jane k liye tickets, calendar pe mahino pehle lag jata hai. Har ek din ki shuruat us calendar pe ek aur din cross karke k hoti hai..

Ghar humara ek wo ghar h jahan papa office bunk karke humko station pe receive karne aate hain, aur darwaze pe maa bell bajne ka wait karti h.

Wo ghar jahan shaam hote hi dost bulate hain "saale kuch mahine aur late aa jata, kisne bulaya tujhe"

Ghar humara wo ghar jahan agle hi din se saare rishteydar dinner pe bulate hain. Aur sabse pehle yahi puchhte hain "kitne din k liye aaya h" aur reply sunte hi taane sun ne padte hain.

Ghar humara wo ghar jahan mammy se baatein karte karte aadhi raat ho jati h, aur maa k late night jagne par tokne k baad puri raat maa ki god me nikal jati hai.

Ghar humara wo ghar jahan subah hote hi breakfast k liye papa zabardasti jaga dete hain, aur sab saath baith k subah ki chaay enjoy karte hain, jahan maa lunch aur dinner ki planning karti hain aur papa career k liye guidelines dete hain par hum nalayako ka saara dhyan to lunch aur dinner ki planning me hi hota hai.

Ghar jahan lunch k baad sab shaam ki chaay tak cards khelne me busy rehte hain, aur purani yaadon ko taza karne me koi kasar nahi chhodte.

Wo ghar jahan bhai behno k sath dinner karte karte baaton me kahin kho jate hain, aur khane pe dhyan tab jata hai jab mammy aawaz lagati hain "nalayako bas karo aata khatam ho gya".

Wo ghar hi hai humara jab wapis jate waqt dadi chupke se 500 ka note deti hain, aur roti maa ko chup karate karate apne aansu aajate hain.

Jab station per jaldi jaldi me papa k pair chhuna bhool jate hain, aur fir sab kuch chhod kar papa se gale milne chal padte hain.

Ghar humara wo ghar jaha se wapis aate hi dobara jane ki planning fir shuru ho jati hai, wohi humara ghar jahan jane craze kabhi kam nhi hota. WO.... HUMARA GHAR !!

-AryaMridul
June 4th, 2014